ਗਰਮ ਤੇਲ ਦੀ ਕੜਾਹੀ ਵਿੱਚ ਹੱਥ ਪਾਇਆਂ ਹੱਥ ਕਿਉਂ ਨਹੀਂ ਜਲ਼ਦੇ?
ਅੱਜ ਦੇ ਵਿਗਿਆਨਕ ਯੁੱਗ ਵਿੱਚ ਵੀ ਬਹੁਤੇ ਲੋਕ ਅਗਿਆਨਤਾ ਤੇ ਡਰ ਕਾਰਣ ਹਨੇਰਾ ਢੋ ਰਹੇ ਹਨ । ਜਿਸ ਕਾਰਣ ਮਾਨਸਿਕ ਤੌਰ ਤੇ ਮਜਬੂਤੀ ਵਾਸਤੇ ਕਿਸੇ ਦੈਵੀ ਆਸਰੇ ਤੇ ਟੇਕ ਰੱਖਦੇ ਹਨ । ਮਨੁੱਖ ਨੇ ਤਕਨੀਕੀ ਪੱਖ ਤੋਂ ਭਾਵੇਂ ਕਾਫੀ ਤਰੱਕੀ ਕਰ ਲਈ ਹੈ । ਪਰ ਵਿਚਾਰਧਾਰਕ ਤੌਰ ਤੇ ਵਿਗਿਆਨਕ ਸੂਝ ਤੋ ਅਜੇ ਊਣੇ ਹੋਣ ਕਾਰਣ ਉਹ ਹਰੇਕ ਵਾਪਰ ਰਹੀ ਘਟਨਾ ਦੀ ਤਹਿ ਤੱਕ ਜਾਣ ਤੋਂ ਪਹਿਲਾਂ ਹੀ ਉਸ ਨੂੰ ਦੈਵੀ ਚਮਤਕਾਰ ਮੰਨਣ ਲੱਗ ਜਾਂਦਾ ਹੈ, ਤੇ ਉਸ ਦਾ ਦੈਵੀ ਸ਼ਕਤੀ ਵਿੱਚ ਵਿਸ਼ਵਾਸ ਹੋਰ ਪੱਕਾ ਹੋ ਜਾਂਦਾ ਹੈ । ਇਸ ਤਰਾਂ ਦੀਆਂ ਵਾਪਰ ਰਹੀਆਂ ਘਟਨਾਵਾਂ ਉਸ ਨੂੰ ਅੰਧ ਵਿਸ਼ਵਾਸ਼ੀ ਬਣਾਉਣ ਸਹਾਈ ਹੁੰਦੀਆਂ ਹਨ । ਕਿਉਂਕਿ ਮਾਨਸਿਕ ਪੱਖੋਂ ਸਾਰੇ ਮਨੁੱਖ ਇਕੋ ਜਿਹੇ ਨਹੀਂ ਹੁੰਦੇ । ਕੁਝ ਜਿਆਦਾ ਹੀ ਚਾਲਾਕ ਕਿਸਮ ਦੇ ਲੋਕ ਇਹਨਾਂ ਹਾਲਤਾਂ ਦਾ ਫਾਇਦਾ ਉਠਾਉਣ ਲਈ ਹਮੇਸ਼ਾਂ ਹੀ ਤਿਆਰ ਰਹਿੰਦੇ ਹਨ । ਇਸ ਵਾਸਤੇ ਤਰਾਂ ਤਰਾਂ ਦੇ ਜਾਲ ਬੁਣਦੇ ਰਹਿੰਦੇ ਹਨ । ਇਹ ਲੋਕ ਆਮ ਆਦਮੀ ਦੀਆਂ ਭਾਵਨਾਵਾਂ ਦਾ ਖਿਲਵਾੜ ਕਰਦੇ ਹੋਏ ਵਿਸ਼ੇਸ਼ ਕਿਸਮ ਦਾ ਅਡੰਬਰ ਰਚ ਕੇ ਕਿਸੇ ਇੱਕ ਜਾਂ ਵਧੇਰੇ ਚਲਾਕੀਆਂ ਰਾਹੀਂ ਉਹਨਾਂ ਦੀ ਹਰ ਪੱਧਰ ਤੇ ਲੁੱਟ ਕਰਦੇ ਰਹਿੰਦੇ ਹਨ । ਇਸ ਤਰਾਂ ਦੀ ਇੱਕ ਉਦਾਹਰਣ ਹੈ ਗਰਮ ਤੇਲ ਦੀ ਕੜਾਹੀ ਵਿੱਚ ਹੱਥ ਪਾਉਣਾ ਤੇ ਹੱਥ ਨਾ ਜਲਣਾ । ਕਈ ਬਾਬਾ ਕਿਸਮ ਦੇ ਲੋਕ ਇਸ ਨੂੰ ਚਮਤਕਾਰ ਵਜੋਂ ਪੇਸ਼ ਕਰਕੇ ਆਪਣੀ 'ਸ਼ਕਤੀ' ਦਾ ਦਿਖਾਵਾ ਕਰਦੇ ਹਨ।
ਇਸ ਕਿਰਿਆ ਵਿੱਚਲੇ ਰਾਜ਼ ਨੂੰ ਜਾਨਣ ਤੋਂ ਪਹਿਲਾਂ ਇਹ ਗੱਲ ਜਰੂਰ ਸਮਝਣੀ ਚਾਹੀਦੀ ਹੈ ਕਿ ਹਰੇਕ ਘਟਨਾ ਪਿਛੇ ਕਾਰਣ ਹੁੰਦਾ ਹੈ, ਜੇ ਕਰ ਕਾਰਣ ਨੂੰ ਜਾਣ ਲਿਆ ਜਾਵੇ ਤਾਂ ਸਾਰੀ ਗੱਲ ਸਪੱਸ਼ਟ ਹੋ ਜਾਂਦੀ ਹੈ । ਅਸੀਂ ਸਾਰੇ ਜਾਣਦੇ ਹਾਂ ਕਿ ਗਰਮ ਕੀਤੇ ਕਿਸੇ ਬਨਸਪਤੀ ਤੇਲ, ਜਿਵੇ ਸਰੋਂ ਦਾ ਤੇਲ ਜਾਂ ਮੂੰਗਫਲੀ ਦਾ ਤੇਲ ਵਗੈਰਾ ਵਿੱਚ ਹੱਥ ਪਾਵਾਂਗੇ ਤਾਂ ਹੱਥ ਜਲ਼ ਜਾਵੇਗਾ । ਉਹ ਹੱਥ ਭਾਵੇਂ ਕਿਸੇ ਆਮ ਵਿਆਕਤੀ ਦਾ ਹੋਵੇ ਜਾਂ ਕਿਸੇ 'ਪਹੁੰਚੇ ਹੋਏ ਪੁਰਸ' ਦਾ । ਤਾਂ ਫਿਰ ? ਹਾਂ ਇੱਥੇ ਹੀ ਦਿਮਾਗੀ ਚਲਾਕੀ ਦੀ ਜਰੂਰਤ ਹੈ । ਹੁਣ ਚਲਾਕ ਆਦਮੀ ਆਪਣੀ ਬੁੱਧੀ ਦੀ ਵਰਤੋਂ ਕਰਦਾ ਹੈ । ਇਹ ਵਰਤੋਂ ਲੋਕ ਭਲਾਈ ਨਾ ਹੋਣ ਦੀ ਥਾਂ ਉਹਨਾਂ ਨੂੰ ਮੂਰਖ ਬਣਾ ਕੇ ਲੁੱਟਣ ਲਈ ਕਰਦਾ ਹੈ । ਇਹ ਚਲਾਕੀ ਕੀ ਹੈ ? ਆਉ ਜਾਣੀਏ, ਤੁਸੀਂ ਇਸ ਤਰਾਂ ਕਰੋ ਇਕ ਕੜਾਹੀ ਵਿੱਚ ਇੱਕ ਕਿੱਲੋ ਸਰੋਂ ਦਾ ਤੇਲ ਪਾਉ, ਇਸ ਦੇ ਨਾਲ ਹੀ 150-200 ਗ੍ਰਾਮ ਤਾਜੇ ਨਿੰਬੂਆਂ ਦਾ ਰਸ ਵੀ ਕੜਾਹੀ ਵਿੱਚ ਪਾ ਦਿਉ । ਕੜਾਹੀ ਨੂੰ ਸਟੋਵ ਜਾਂ ਗੈਂਸ ਦੇ ਚੁੱਲ੍ਹੇ ਉੱਪਰ ਰੱਖ ਕੇ ਗਰਮ ਕਰਨਾ ਸ਼ੁਰੂ ਕਰ ਦਿਉ । ਥੋੜੀ ਦੇਰ ਬਾਅਦ ਤੇਲ ਉਬਲਣਾ ਸ਼ੁਰੂ ਕਰ ਦੇਵੇਗਾ । ਹੁਣ ਤੁਸੀਂ ਹੱਥ ਨੂੰ ਸਰੋਂ ਦਾ ਠੰਡਾ ਤੇਲ ਮਲ਼ ਕੇ ਕੜਾਹੀ ਵਿੱਚਲੇ ਤੇਲ ਨੂੰ ਹਥੇਲੀ ਨਾਲ ਸਪਰਸ ਕਰਦੇ ਹੋਏ ਤੇਲ ਵਿੱਚ ਹੱਥ ਪਾਵੋ । ਹੱਥ ਨਹੀਂ ਜਲ਼ੇਗਾ । ਕਿਉਂਕਿ ਸਰੋਂ ਦੇ ਤੇਲ ਸਮੇਤ ਬਨਸਪਤੀ ਤੇਲਾਂ ਦਾ ਉਬਾਲ ਦਰਜਾ 300 ਸੈਂਟੀਗਰੇਡ ਤੋਂ ਉੱਪਰ ਹੁੰਦਾ ਹੈ । ਇਸ ਵਿੱਚ ਨਿੰਬੂ ਦਾ ਰਸ ਪਾਉਣ ਕਾਰਣ ਇਹ 100 ਦਰਜਾ ਸੈਂਟੀਗਰੇਡ ਤੇ ਉੱਬਲਣਾ ਸ਼ੁਰੂ ਕਰ ਦਿੰਦਾ ਹੈ । ਦਰਅਸਲ ਨਿੰਬੂ ਦਾ ਰਸ ਤੇਲ ਨਾਲੋਂ ਭਾਰਾ ਹੋਣ ਕਰਕੇ ਕੜਾਹੀ ਦੇ ਥੱਲੇ ਰਹਿੰਦਾ ਹੈ ਤੇ ਸ਼ੇਕ ਨਾਲ ਰਸ ਉਬਲਣਾ ਸ਼ੁਰੂ ਕਰ ਦਿੰਦਾ ਹੈ । ਪਰ ਤੇਲ ਹਲਕਾ ਹੋਣ ਕਰਕੇ ਤੇ ਉੱਪਰ ਹੋਣ ਕਰਕੇ ਘੱਟ ਗਰਮ ਹੁੰਦਾ ਹੈ । ਇਸ ਤਰ੍ਹਾਂ ਉਬਲਦੇ ਤੇਲ ਵਿੱਚ ਹੱਥ ਪਾਇਆ ਜਾਂਦਾ ਹੈ ।
ਯਾਦ ਰੱਖੋ ਇਹ ਪ੍ਰਯੋਗ ਕਿਸੇ ਤਜਰਬੇਕਾਰ ਸਾਥੀ ਦੀ ਮੱਦਦ ਨਾਲ ਕੀਤਾ ਜਾਵੇ ।
ਹਰਚੰਦ ਭਿੰਡਰ
